قصيدة غزلية فكاهية ممتعة

حــتــى وردنـي تالـي الـليـل جــوال

ــــــــــــــــــــــــــــ وانا على شاهي وبسكـوت ديمـة

الرقم بايخ لكـن الــصــوت قــتـال

ــــــــــــــــــــــــــــ كنــه مثل صـوت المذيعـة حليمـة

قــالت مساء الخير يـا طيّـب الفـال

ــــــــــــــــــــــ قـلـت ارحــبـي تــرحيبـةٍ مستديمـة

بـالـعــود والصفـري ودلـة وفنجـال

ــــــــــــــــــــــــــــــ واجـبـك يا بنت الأصـول الكريمـة

وردت بضحكة ثم قالت وش الحـال؟

ــــــــــــــــــــــــــــــــــــ قلت اشهد إن الحال عقبك سقيمـة

قالت وهي تضحك بعد مثل الأطفال

ــــــــــــــــــــــــــــــــــــ وانـــا بـعـــد كــنــي بــدونـك يتيمـة

مـــن يـوم قـالـتهـا تزلزلـت زلـزال

ـــــــــــــــــــــــــــــــــــ مــن فجعتي كنـي مسـوي جريمـة

قلت ارفعي صوتك ترى مابه ارسال

ــــــــــــــــــــــــــــــــــــــــــ كـــذاب لــكـنّ المصيبـة عظيمـة

قالت أقول اسمع ترى هرجنـا طـال

ـــــــــــــــــــــــــــــــــــــــــــــ مــمكـن تصاحبنـي ترانـي وسيمـة

واسمي الحقيقي أول حروفـه الـدال

ـــــــــــــــــــــــــــــــــــــــــــــــ لــكـــن يسمّونـي البنـات الزعيمـة

صحيح أحب الفخفخة واعشق المال

ــــــــــــــــــــــــــــــــــــــــــــــ لكـن ترانـي طــاهــرة مستقيـمـة

ما عندي امغازل ولا لعب يهّـال

ــــــــــــــــــــــــــــــــــــــــــــــ ما عندي إلا في الشرف والحشيمـة

بس الصراحة قلبي لشوفتـك مـال

ــــــــــــــــــــــــــــــــــــــــــــــ واصبحت وحدك جالسٍ في صميمه

فكّر بعقلك واترك القيـل والقـال

ـــــــــــــــــــــــــــــــــــــــــ واحذر تطيع اهل العقـول العقيمـة

وارسل علي الحين خمسميـة ريـال

ـــــــــــــــــــــــــــــــــــــــــــ أشحن بهـا جـوال أختـي غنيمـة

أو طقم غالي فيه خاتـم وسلسـال

ــــــــــــــــــــــــــــــــــــــــ أروح بـه فـي عـرس ولاّ عزيمـة

قلت الحقيقة مانيب رجـل أعمـال

ــــــــــــــــــــــــــــــــــ ولانـي بتاجـر والمـوارد عديـمـة

أنا الصراحة شبـه عطّـال بطّـال

ــــــــــــــــــــــــــــــــــ وعلاقتـي بالفــقـــر جـداً حميـمـة

والراتب الله يرحم الحـال مـا زال

ـــــــــــــــــــــــــــــــــ محـدود والمصـروف ربـي عليمـه

والــديـن بـالآلاف والبنـك شغّـال

ـــــــــــــــــــــــــــــ يــاكـل فـلـوسـي بالربـا والظليمـة

والسوق طايح والغلا ضيّـق البـال

ـــــــــــــــــــــــــــــــ والموت والله صايـر اكبـر غنيمـة

قالت تحمّل بـس والحمـل ينشـال

ــــــــــــــــــــــــــــــ خلك شديد الباس صلـب العزيمـة

ياخي تصرّف جعلك اتصيـر نشّـال

ــــــــــــــــــــــــــــــــ أهـــــم شــي إن النوايـا سليـمـة

لابــد تـفـهمني علـى كـل الأحـوال

ــــــــــــــــــــــــــــ ما دمت من أهل العقـول الفهيمـة

قلت إيه والله فاهم اللي على البـال

ـــــــــــــــــــــــــــــــــــــــــ لــكــن تــرى هـذي علينـا قديمـة

يــا بـنت هـذا صايـر اليـوم مـوال

ـــــــــــــــــــــــــــــــــــــــــــ للي تبي تلعب علـى ابـن اللئيمـة

يا بـنــت ما تدرين كـم فيـه محتـال

ــــــــــــــــــــــــــــــــــــ يلعب على الحبلين وانتـي غشيمـة

يا بنت كم من جاهلة دمعها سـال

ـــــــــــــــــــــــــــــــــــ من عقب ما جات العواقب وخيمـة

والبنت لا اقتفى عرضها بيد الأنـذال

ـــــــــــــــــــــــــــــــــ والله مــا يــبـقـى لهـا أي قيـمـة

قالت تبي ولاّ فـ خـلّك علـى جـال

ـــــــــــــــــــــــــــــــــــــــــــ مهوب ناقصـني نصايـح حكيمـة

عز الله إنك للأسف منـت رجّـال

ــــــــــــــــــــــــــــــــــــــــ وانك قليل الذوق ما فيـك شيمـة

يا لعنبو اللي مـا يسطّـرك بنعـال

ـــــــــــــــــــــــــــــــــــــــــــ حــتـى يـعـلمـك الغـزل يـا بهيمـة

تفو عليك وصكّت الخط في الحال
ـــــــــــــــــــــــــــــــــــــــــــــ مدري ( تفو ) هي مدح ولاّ شتيمـة

قصيدة غزلية فكاهية ممتعة

قصيدة غزلية فكاهية ممتعة

قصيدة غزلية فكاهية ممتعة :: تعاليق